Rydych yma : Hafan > Bro Ddyfi Hafan > Newyddion > Diwrnod Cadw’n Iach a Diogel Bro Ddyfi yn llwyddiant mawr

Diwrnod Cadw’n Iach a Diogel Bro Ddyfi yn llwyddiant mawr

17th Mar 2009

Mynychodd dros 500 o bobl y Diwrnod Cadw’n Iach a Diogel yng Nghanolfan Hamdden Bro Ddyfi, Machynlleth, Ddydd Mercher 18fed Chwefror. Trefnwyd y digwyddiad rhad ac am ddim hwn gan Gymunedau yn Gyntaf Bro Ddyfi fel ymateb i Her Iechyd Cymru, ffocws cenedlaethol ar well iechyd yng Nghymru.

 

 

Roedd y Ganolfan Hamdden yn llawn o ystod eang o arddangoswyr yn tynnu sylw at wasanaethau a gweithgareddau sydd ar gael yn lleol neu mewn mannau eraill ym Mhowys ac yn gallu helpu i wella a chynnal iechyd a lles pobl. Roedd gwybodaeth a chyngor i’w gael ar atal troseddu, cludiant lleol, gwirfoddoli, ôl troed eco, Cadw Cymru’n Daclus, incwm, pensiwn, tai, bywyd iach, dallineb neu olwg yn gwaethygu, colli clyw, gofal cymdeithasol a llawer mwy. 

 

 

Roedd y digwyddiad yn cynnig diwrnod allan yn llawn o hwyl i’r teulu cyfan oedd yn cynnwys Cinio Iach a llawer o weithgareddau yn cynnwys Castell gwynt, Paentio wynebau, Dringo wal, Nofio, Ardal chwarae meddal, Bowlio, Hyfforddiant dawnsio a pherfformiad, Taith gerdded grŵp, a Ioga/Pilates i blant a rhai dros 50 oed.

 

Roedd Gwasanaeth Tân ac Achub Canolbarth a Gorllewin Cymru yn bresennol i archwilio Blancedi Trydan a chynnig rhai eraill yn eu lle yn ôl yr angen. Roedd cyfle hefyd i gofrestru am Archwiliad Diogelwch Tân yn y Cartref, tra roedd nyrsys lleol gerllaw i helpu gyda ffitio’r sliperi poblogaidd a rannwyd yn rhad ac am ddim i’r henoed. Rhoddwyd y rhain gan Wasanaeth Gofal Cymdeithasol Powys.

 

Roedd cyfle hefyd i fwrw golwg dros gerbydau lleol Y Groes Goch, ac i gael sgwrs gyda saer ar Fan Bobi (Heddlu Dyfed – Powys) a oedd wrth law i gynnig cyngor arbenigol i’r henoed ac aelodau bregus eraill o’r gymuned ynglŷn â throseddu yn ymwneud ag eiddo.

 

Enillwyr y Raffl rad ac am ddim oedd:

 

1)     Stella Maddock - Bin Compost a chadi cegin (Rhodd gan Reoli Gwastraff Cyngor Sir Powys)

2)     Tegwen Morris -  Nofio i’r teulu (Rhodd gan Ganolfan Hamdden Bro Ddyfi)

3)      Non Bleddyn Jones  - Nofio i’r teulu (Rhodd gan Ganolfan Hamdden Bro Ddyfi)

4)     Valerie Heard – Ambarél Cymunedau yn Gyntaf

 

Dywedodd Cyril Evans, Cydlynydd Cymunedau yn Gyntaf, “Mewn ardal wledig iawn fel Bro Ddyfi mae’n gallu bod yn anodd dod o hyd i wybodaeth ar brydiau ac i ddarganfod beth yn union sy’n digwydd yn lleol. Rydym yn hynod o falch o fedru gweithio mewn partneriaeth â Chyngor Sir Powys a Her Iechyd Cymru i’n galluogi i drefnu diwrnod sydd wedi bod yn fwynhad, yn werth chweil ac yn llawn gwybodaeth i’r gymuned gyfan. Buaswn yn hoffi diolch o galon i Staff Canolfan Hamdden Bro Ddyfi a’r Siop Goffi am eu holl gymorth i wneud y diwrnod hwn yn gymaint o lwyddiant.”

 

Am fwy o wybodaeth am raglen Cymunedau yn Gyntaf Bro Ddyfi, mae croeso i chi alw yn y swyddfa yn Yr Hen Siop, Bryn y Gog, Machynlleth, neu gallwch ymweld â’n gwefan http://commfirstpowys.org.uk/broddyfi/

Back to Main News Page